Author: Asrar

‘aks ban kar chala gaya main bhi
aaine mein koi gali nikli

ek lamhe ko DhunDne ke liye
waqt ki rah par sadi nikli

hum ne dariya nichoD kar dekha
us ke andar se tishnagi nikli

maut ne jism par jo dastak di
ruh le kar ye zindagi nikli

dekhiye dasht-e-asman ‘asrar’
in sitaron ki ek nadi nikli

عکس بن کر چلا گیا میں بھی
آئنے میں کوئی گلی نکلی

ایک لمحے کو ڈھونڈنے کے لئے
وقت کی راہ پر صدی نکلی

ہم نے دریا نچوڑ کر دیکھا
اس کے اندر سے تشنگی نکلی

موت نے جسم پر جو دستک دی
روح لے کر یہ زندگی نکلی

دیکھیے دشت آسماں اسرارؔ
ان ستاروں کی اک ندی نکلی

mere wujud ka koi in’aam bhi nahin
ya’ni tere labon pe mera naam bhi nahin

zanjir-e-husn mein hamein bandha gaya hai kyon
hum par to tere ‘ishq ka ilzaam bhi nahin

takte hain farsh-e-nutq se ‘arsh-e-KHayaal ko
muddat hui ki barish-e-ilhaam bhi nahin

میرے وجود کا کوئی انعام بھی نہیں
یعنی ترے لبوں پہ مرا نام بھی نہیں

زنجیر حسن میں ہمیں باندھا گیا ہے کیوں
ہم پر تو تیرے عشق کا الزام بھی نہیں

تکتے ہیں فرش نطق سے عرش خیال کو
مدت ہوئی کہ بارش الہام بھی نہیں

hamari ruh ne jab is badan ko dekha tha
to yun laga ki kisi ne kafan ko dekha tha

wo kaun apni nigahon se baat karta tha
wo hum ne bazm mein kis ke suKHan ko dekha tha

kali kali pe fidai likha hua paya
kuchh is ada se KHizaaN ne chaman ko dekha tha

‘ajib haal tha fikr-e-ma’ash mein us ne
na teri zulf na daar-o-rasan ko dekha tha

do chaar gam qarib aa gai mere manzil
baghaur us ne safar ki thakan ko dekha tha

‘ata hui thin ‘ajib-o-gharib si nazren
har ek zarre mein ek anjuman ko dekha tha

phir ek KHama ki qirtaas par paDi thi nazar
phir ek jaam ne tishna-dahan ko dekha tha

usi nigaah-e-‘inayat ki dein hun ‘asrar’
ki jis nigah se ghazal ne dakan ko dekha tha

ہماری روح نے جب اس بدن کو دیکھا تھا
تو یوں لگا کہ کسی نے کفن کو دیکھا تھا

وہ کون اپنی نگاہوں سے بات کرتا تھا
وہ ہم نے بزم میں کس کے سخن کو دیکھا تھا

کلی کلی پہ فدائی لکھا ہوا پایا
کچھ اس ادا سے خزاں نے چمن کو دیکھا تھا

عجیب حال تھا فکر معاش میں اس نے
نہ تیری زلف نہ دار و رسن کو دیکھا تھا

دو چار گام قریب آ گئی مرے منزل
بغور اس نے سفر کی تھکن کو دیکھا تھا

عطا ہوئی تھیں عجیب و غریب سی نظریں
ہر ایک ذرہ میں ایک انجمن کو دیکھا تھا

پھر ایک خامے کی قرطاس پر پڑی تھی نظر
پھر ایک جام نے تشنہ دہن کو دیکھا تھا

اسی نگاہ عنایت کی دین ہوں اسرارؔ
کہ جس نگہ سے غزل نے دکن کو دیکھا تھا

ek aadha-adhura she’r hua
der se koi pas gum-sum hai

main sitaron ke darmiyan ka sukut
bahti naddi tera takallum hai

karun izhaar-e-shiddat-e-ehsas
ek aansu hai ek tabassum hai

main haqiqat hun ek KHwab hai tu
kya tayaqqun hai kya tawahhum hai

ایک آدھا ادھورا شعر ہوا
دیر سے کوئی پاس گم صم ہے

میں ستاروں کے درمیاں کا سکوت
بہتی ندی ترا تکلم ہے

کروں اظہار شدت احساس
ایک آنسو ہے اک تبسم ہے

میں حقیقت ہوں ایک خواب ہے تو
کیا تیقن ہے کیا توہم ہے

tumhaare KHwab se hum der tak bahalte hain
phir apne dast-e-haqiqat se aankh malte hain

hudud-e-dasht-e-yaqin hum ko de rahi hai sada
fasil-e-shahr-e-guman se hum ab nikalte hain

suna hai ‘ishq ka mai-KHana hai wo mai-KHana
jahan pe girte hain wo bhi jo kuchh sanbhalte hain

purani mai nae kason mein Dali jati hai
KHayal-o-fikr kahan zawiye badalte hain

pata mila ki suKHan-shahr mein dakan kucha
wali-o-taj ke naqsh-e-qadam pe chalte hain

ai taj dekh raha hun teri nigar-e-hayat
tamam rang nae hain jo is mein Dhalte hain

tumhaare zikr se raushan hai bazm-e-tanhai
tumhaari yaad ke dil mein charagh jalte hain

mili hai hum ko wirasat mein sha’iri ‘asrar’
KHayal-o-fikr hamare usi pe palte hain

تمہارے خواب سے ہم دیر تک بہلتے ہیں
پھر اپنے دست حقیقت سے آنکھ ملتے ہیں

حدود دشت یقیں ہم کو دے رہی ہے صدا
فصیل شہر گماں سے ہم اب نکلتے ہیں

سنا ہے عشق کا مے خانہ ہے وہ مے خانہ
جہاں پہ گرتے ہیں وہ بھی جو کچھ سنبھلتے ہیں

پرانی مے نئے کاسوں میں ڈالی جاتی ہے
خیال و فکر کہاں زاویے بدلتے ہیں

پتا ملا کہ سخن شہر میں دکن کوچہ
ولی و تاج کے نقش قدم پہ چلتے ہیں

اے تاج دیکھ رہا ہوں تری نگار حیات
تمام رنگ نئے ہیں جو اس میں ڈھلتے ہیں

تمہارے ذکر سے روشن ہے بزم تنہائی
تمہاری یاد کے دل میں چراغ جلتے ہیں

ملی ہے ہم کو وراثت میں شاعری اسرارؔ
خیال و فکر ہمارے اسی پہ پلتے ہیں

KHizan-gazida labon se ada karen tera nam
hamari sans se aae bahaar ki KHushbu

nasim-e-subh hawa-e-chaman ki baad-e-bahaar
hazar nam se yaad aae yar ki KHushbu

phir aaj mausam-e-hijran pe chhae abr-e-visal
zamin-e-dil se uThe intizar ki KHushbu

kisi ke lams ki tasir hai chaman mein aaj
ki hum ko lagti hai phulon si KHar ki KHushbu

خزاں گزیدہ لبوں سے ادا کریں ترا نام
ہماری سانس سے آئے بہار کی خوشبو

نسیم صبح ہوائے چمن کہ باد بہار
ہزار نام سے یاد آئے یار کی خوشبو

پھر آج موسم ہجراں پہ چھائے ابر وصال
زمین دل سے اٹھے انتظار کی خوشبو

کسی کے لمس کی تاثیر ہے چمن میں آج
کہ ہم کو لگتی ہے پھولوں سی خار کی خوشبو

saqiya jam ke pila aaKHir-e-shab
chal paDi kaisi hawa aaKHir-e-shab

mujh ko le jae sitaron ke pare
wo jo hai hur-numa aaKHir-e-shab

kah gai mujh se ghazal ka matla’
KHushbu-e-dast-e-hina aaKHir-e-shab

ek tarannum mein saji KHamoshi
gungunata main raha aaKHir-e-shab

ek tere nam pe hanste rote
puchh kya kya na kiya aaKHir-e-shab

subh hone ko hai bimar chala
yaad kya aai dawa aaKHir-e-shab

us pari-zad ke afsane tamam
chand-taron se suna aaKHir-e-shab

ab teri yaad ke jugnu bhi bujhe
tirgi aur bhi siwa aaKHir-e-shab

shab-nazhad aane ko hai ai ‘asrar’
rah taron se saja aaKHir-e-shab

ساقیا جم کے پلا آخر شب
چل پڑی کیسی ہوا آخر شب

مجھ کو لے جائے ستاروں کے پرے
وہ جو ہے حور نما آخر شب

کہہ گئی مجھ سے غزل کا مطلع
خوشبوئے دست حنا آخر شب

اک ترنم میں سجی خاموشی
گنگناتا میں رہا آخر شب

اک ترے نام پہ ہنستے روتے
پوچھ کیا کیا نہ کیا آخر شب

صبح ہونے کو ہے بیمار چلا
یاد کیا آئی دوا آخر شب

اس پری زاد کے افسانے تمام
چاند تاروں سے سنا آخر شب

اب تری یاد کے جگنو بھی بجھے
تیرگی اور بھی سوا آخر شب

شب نژاد آنے کو ہے اے اسرارؔ
راہ تاروں سے سجا آخر شب

ek abr sa KHayal ka chhaya ki kya hua
qatra kisi ki yaad ka Tapka ki kya hua

yun sukhe sukhe pat pe us ne rakhe qadam
jun main ne apna she’r sunaya ki kya hua

kyon aaj dast-basta junun de raha hisab
dekho KHirad ne hashr uThaya ki kya hua

thi kaenat-e-huzn mein halki si raushni
wo aaKHiri sitara bhi TuTa ki kya hua

aansu bhi ek aah se nikle wo muskurae
kya kya hua na us ne jo puchha ki kya hua

ek KHwab-e-KHush-KHiram tasawwur ke dasht mein
‘asrar’ tujh ko DhunDne nikla ki kya hua

اک ابر سا خیال کا چھایا کہ کیا ہوا
قطرہ کسی کی یاد کا ٹپکا کہ کیا ہوا

یوں سوکھے سوکھے پات پہ اس نے رکھے قدم
جوں میں نے اپنا شعر سنایا کہ کیا ہوا

کیوں آج دست بستہ جنوں دے رہا حساب
دیکھو خرد نے حشر اٹھایا کہ کیا ہوا

تھی کائنات حزن میں ہلکی سی روشنی
وہ آخری ستارہ بھی ٹوٹا کہ کیا ہوا

آنسو بھی ایک آہ سے نکلے وہ مسکرائے
کیا کیا ہوا نہ اس نے جو پوچھا کہ کیا ہوا

اک خواب خوش خرام تصور کے دشت میں
اسرارؔ تجھ کو ڈھونڈنے نکلا کہ کیا ہوا

jo kisi moD par Thahar jaun
rasta puchhega kidhar jaun

samne frosT ka hai doraha
main idhar jaun ya udhar jaun

rasta de raha hai aaj falak
sochta hun ki apne ghar jaun

qafas-e-be-fasil hai ya’ni
shahr hi shahr hai jidhar jaun

zard patton ka qafila hun main
kab bahaar aae kab bikhar jaun

shakl-e-ma’dum par nigah-e-wujud
aaj manzur hai ki kar jaun

ye mera ‘aks hai ki ye main hun
toD kar aaina na Dar jaun

yaad ka be-kanar dariya hai
kashti-e-waqt se utar jaun

main teri yaad mein jo jita hun
bhul sakta nahin ki mar jaun

jaanta hun ki KHwab hai ‘asrar’
is haqiqat se be-KHabar jaun

جو کسی موڑ پر ٹھہر جاؤں
راستہ پوچھے گا کدھر جاؤں

سامنے فروسٹ کا ہے دوراہا
میں ادھر جاؤں یا ادھر جاؤں

راستہ دے رہا ہے آج فلک
سوچتا ہوں کہ اپنے گھر جاؤں

قفس بے فصیل ہے یعنی
شہر ہی شہر ہے جدھر جاؤں

زرد پتوں کا قافلہ ہوں میں
کب بہار آئے کب بکھر جاؤں

شکل معدوم پر نگاہ وجود
آج منظور ہے کہ کر جاؤں

یہ مرا عکس ہے کہ یہ میں ہوں
توڑ کر آئنہ نہ ڈر جاؤں

یاد کا بے کنار دریا ہے
کشتیٔ وقت سے اتر جاؤں

میں تری یاد میں جو جیتا ہوں
بھول سکتا نہیں کہ مر جاؤں

جانتا ہوں کہ خواب ہے اسرارؔ
اس حقیقت سے بے خبر جاؤں

mausam-e-gul mein aah-e-sard bharun
mughni-e-KHush-nawa ko yun bhi sunun

meri nok-e-qalam se chaak hua
sina-e-KHat se bah raha hai KHun

ai KHuda ab main bab-e-shahr-e-wujud
mulk-e-ma’dum mein kahan DhunDun

kaenat-e-daraaz bhi ‘asrar’
nap lunga gar ek gam baDhun

موسم گل میں آہ سرد بھروں
مغنیٔ خوش نوا کو یوں بھی سنوں

میری نوک قلم سے چاک ہوا
سینۂ خط سے بہہ رہا ہے خوں

اے خدا اب میں باب شہر وجود
ملک معدوم میں کہاں ڈھونڈوں

کائنات دراز بھی اسرارؔ
ناپ لوں گا گر ایک گام بڑھوں

wo jo the dar-ba-dar chune hum ne
apne jaise hi ghar chune hum ne

sab samandar nigal gae dekho
kitne gahre bhanwar chune hum ne

raat mein ham-safar ke qadmon se
kuchh nujum-o-qamar chune hum ne

KHwab mein ghar gira hue bedar
aur diwar-o-dar chune hum ne

dhup-chhanw bikhar gae mil kar
phir ye sham-o-sahar chune hum ne

jab qafas se riha hue panchhi
un ke kuchh baal-o-par chune hum ne

jin pe lamhon ke koi phal na uge
waqt ke wo shajar chune hum ne

Tut kar din bikhar gaya sara
phir ye aaThon pahar chune hum ne

Dub kar nind ke samundar mein
KHwab ke kuchh guhar chune hum ne

manzilen hain na raste ‘asrar’
kaise kaise safar chune hum ne

وہ جو تھے دربدر چنے ہم نے
اپنے جیسے ہی گھر چنے ہم نے

سب سمندر نگل گئے دیکھو
کتنے گہرے بھنور چنے ہم نے

رات میں ہم سفر کے قدموں سے
کچھ نجوم و قمر چنے ہم نے

خواب میں گھر گرا ہوئے بیدار
اور دیوار و در چنے ہم نے

دھوپ‌ چھاؤں بکھر گئے مل کر
پھر یہ شام و سحر چنے ہم نے

جب قفس سے رہا ہوئے پنچھی
ان کے کچھ بال و پر چنے ہم نے

جن پہ لمحوں کے کوئی پھل نہ اگے
وقت کے وہ شجر چنے ہم نے

ٹوٹ کر دن بکھر گیا سارا
پھر یہ آٹھوں پہر چنے ہم نے

ڈوب کر نیند کے سمندر میں
خواب کے کچھ گہر چنے ہم نے

منزلیں ہیں نہ راستے اسرارؔ
کیسے کیسے سفر چنے ہم نے

chaman chaman mein nae jun gulab khilte hain
hamare KHun se yun inqalab khilte hain

‘ajib zid hai ki murjha gai hain ta’biren
magar nae se phir aankhon mein KHwab khilte hain

bas ek umid liye ji rahe hain sahra mein
hum aise phul faqat sun ke aab khilte hain

kai jawab the jo bo gae sawalon ko
kai sawal hain jo la-jawab khilte hain

kisi ka lams KHudaya ‘ayan na kar de inhen
hamare zaKHm to zer-e-hijab khilte hain

bujhe bujhe se charaghon ki raushni le kar
hamare sae mein phir aaftab khilte hain

چمن چمن میں نئے جوں گلاب کھلتے ہیں
ہمارے خون سے یوں انقلاب کھلتے ہیں

عجیب ضد ہے کہ مرجھا گئی ہیں تعبیریں
مگر نئے سے پھر آنکھوں میں خواب کھلتے ہیں

بس اک امید لئے جی رہے ہیں صحرا میں
ہم ایسے پھول فقط سن کے آب کھلتے ہیں

کئی جواب تھے جو بو گئے سوالوں کو
کئی سوال ہیں جو لاجواب کھلتے ہیں

کسی کا لمس خدایا عیاں نہ کر دے انہیں
ہمارے زخم تو زیر حجاب کھلتے ہیں

بجھے بجھے سے چراغوں کی روشنی لے کر
ہمارے سائے میں پھر آفتاب کھلتے ہیں

kis ko qarib jaanta hai kaun dur hai
kya ‘aql ki KHata hai ki dil ka qusur hai

hum ne kaha na tum ne suna ek waqi’a
paDh likh sake bhi kya ki jo bainassutur hai

lamhat-e-wasl bhi hain shab-e-hijr ki tarah
jitna hua qarib wo utna hi dur hai

hum ko hai shauq-e-did hum ahl-e-nazar hue
ye tirgi hamare liye zill-e-nur hai

taswir jalwa-saz-e-musawwir hai is tarah
meri nigah muntazar-e-koh-e-tur hai

hain mahfil-e-rumuz mein ‘asrar’ jalwa-gar
hairan na ho ki ‘aql junun ke huzur hai

کس کو قریب جانتا ہے کون دور ہے
کیا عقل کی خطا ہے کہ دل کا قصور ہے

ہم نے کہا نہ تم نے سنا ایک واقعہ
پڑھ لکھ سکے بھی کیا کہ جو بین السطور ہے

لمحات وصل بھی ہیں شب ہجر کی طرح
جتنا ہوا قریب وہ اتنا ہی دور ہے

ہم کو ہے شوق دید ہم اہل نظر ہوئے
یہ تیرگی ہمارے لئے ظل نور ہے

تصویر جلوہ ساز مصور ہے اس طرح
میری نگاہ منتظر کوہ طور ہے

ہیں محفل رموز میں اسرارؔ جلوہ گر
حیراں نہ ہو کہ عقل جنوں کے حضور ہے

bazm-e-anjum mein numayan na hue
KHak-posh aaj jo ‘uryan na hue

dair mein sahab-e-iman hue hum
aap ka’be mein musalman na hue

KHud-kushi thi wo koi qatl nahin
dekho hum KHun-ba-daman na hue

kya hua hoga un ashkon ka ki jo
intiKHab-e-sar-e-mizhgan na hue

kuchh sabab hai ki ghazal hoti nahin
aap ke gesu pareshan na hue

hum bhi ‘asrar’ junun jaante hain
bas kabhi chaak-gareban na hue

بزم انجم میں نمایاں نہ ہوئے
خاک پوش آج جو عریاں نہ ہوئے

دیر میں صاحب ایماں ہوئے ہم
آپ کعبے میں مسلماں نہ ہوئے

خودکشی تھی وہ کوئی قتل نہیں
دیکھو ہم خون بہ داماں نہ ہوئے

کیا ہوا ہوگا ان اشکوں کا کہ جو
انتخاب سر مژگاں نہ ہوئے

کچھ سبب ہے کہ غزل ہوتی نہیں
آپ کے گیسو پریشاں نہ ہوئے

ہم بھی اسرارؔ جنوں جانتے ہیں
بس کبھی چاک گریباں نہ ہوئے